കൊറോണ വൈറസ് പകര്‍ച്ചവ്യാധിയുടെ പശ്ചാത്തലത്തിൽ പൗരത്വ ബില്ലിനെതിരെ ഡല്‍ഹി ഷഹീൻ ഭാഗിൽ പ്രതിഷേധിക്കുന്ന മുസ്‌ലിം സ്ത്രീകളെ ഡൽഹി പോലീസ് നീക്കി.

6 സ്ത്രീകളടക്കം 9 പ്രതിഷേധക്കാരെ കസ്റ്റഡിയിൽ എടുത്ത് അടുത്തുള്ള പോലീസ് സ്റ്റേഷനിലേക്ക് കൊണ്ട് പോയതായി പോലീസ് ഡെപ്യൂട്ടി കമ്മിഷണർ (സൗത്ത് ഈസ്റ്റ് ) ആര്‍ പി മീണ മാധ്യമങ്ങളോട് പറഞ്ഞു.

മുസ്‌ലിം വിരുദ്ധവും ഭരണഘടനാവിരുദ്ധവുമായ’ പൗരത്വ നിയമത്തിൽ പ്രതിഷേധിച്ച് ഷഹീൻ ബാഗിൽ മുസ്‌ലിം സ്ത്രീകൾ മൂന്നുമാസത്തിലേറെ കുത്തിയിരിപ്പ് സമരം നടത്തിയിരുന്നു. കൊറോണ വൈറസ് കാരണം ഡൽഹിയിൽ ലോക്ക്ഡ ഡൌൺ ഏർപ്പെടുത്തിയിരിക്കുന്നതിനാൽ സൈറ്റ് ഉപേക്ഷിക്കാൻ അവരോട് അഭ്യർത്ഥിച്ചു. എന്നാൽ പ്രതിഷേധക്കാർ നീങ്ങാൻ വിസമ്മതിച്ചപ്പോൾ അവർക്കെതിരെ നടപടിയെടുത്തതായി മീണ പറഞ്ഞു. പിടിച്ചു മാറ്റുമ്പോൾ വേദിയിൽ അൻപതോളം പ്രതിഷേധക്കാർ ഉണ്ടായിരുന്നു.

“ഞങ്ങൾ എതിര്‍ക്കുകയും പോലീസ് ഞങ്ങളെ കസ്റ്റഡിയിലെടുക്കുകയും ചെയ്തു, കൊറോണ വൈറസ് സ്ഥിതി നിയന്ത്രണവിധേയമായ ശേഷം ഞങ്ങൾ പ്രതിഷേധം പുനരാരംഭിക്കും ” അവർ മാധ്യമങ്ങളോട് പറഞ്ഞു.

“കോവിഡ്‌ ー 19 മുൻകരുതലുകൾ കണക്കിലെടുത്ത് ഞങ്ങളുടെ പ്രതിഷേധ സൈറ്റ് പ്രതീകാത്മക രൂപത്തിലേക്ക് ചുരുക്കിയിട്ടും ദില്ലി പോലീസ് ബലപ്രയോഗം നടത്തി. ഈ പ്രക്രിയയിൽ 6 സ്ത്രീകളെയും 3 പുരുഷ സന്നദ്ധ പ്രവർത്തകരെയും കസ്റ്റഡിയിലെടുത്തിട്ടുണ്ട്. ”രാജ്യത്തെ പൗരത്വസമരത്തിന്റെ ഊര്‍ജകേന്ദ്രമായ ഷഹീന്‍ബാഗിന്റെ ഔദ്യോഗിക ട്വിറ്റര്‍ ഹാന്റിലില്‍ ഇത് സംബന്ധിച്ചു വന്ന ട്വീറ്റ്.

“പ്രദേശത്ത് നിന്ന് കൂടുതൽ തടങ്കലുകളോ അറസ്റ്റുകളോ നടക്കുന്നില്ലെന്ന് ഉറപ്പാക്കാൻ ഞങ്ങളെ സഹായിക്കണമെന്നു സിവിൽ സമൂഹത്തോട് ഞങ്ങൾ അഭ്യർത്ഥിക്കുന്നു, ”അവർ കൂട്ടിച്ചേർത്തു.

“ഭരണഘടനക്ക് അതിന്റെ ഏടുകളിൽ നിന്നും ഇറങ്ങി ആളുകളുടെ ദൈനംദിന ജീവിതത്തിലേക്ക് ഇറങ്ങിച്ചെല്ലാൻ ശഹീൻ ബാഗ് ശാശ്വതമായ പ്രതീക്ഷ നൽകി. ഇത് നിലനിൽക്കും , ഷഹീൻ ബാഗ് ഹൃദയത്തിലും ഭാവനയിലും ജീവിക്കും” നിരവധി പേര്‍ ട്വീറ്റ് ചെയ്തു.

കൊറോണ വൈറസ് പകർച്ചവ്യാധി കൊണ്ടുള്ള നിയന്ത്രണം കാരണം ഞായറാഴ്ച 5 സ്ത്രീകൾ മാത്രമാണ് അവിടെ ഉണ്ടായിരുന്നത്. മറ്റുള്ളവർ ഐക്യദാർഢ്യ പ്രതീകമായി പാദരക്ഷകൾ അവിടെ ഉപേക്ഷിച്ചിരുന്നു. കൊറോണ വൈറസ് കാരണം സ്ത്രീകൾ എല്ലാ മുൻകരുതലുകളും എടുത്തിരുന്നു, കൂടാതെ ശുചിത്വം ഉറപ്പാക്കാൻ വേദിയിൽ സാനിറ്റൈസറുകൾ ക്രമീകരിച്ചിരുന്നു.

പ്രതിഷേധ സ്ഥലത്തിന് സമീപം ഞായറാഴ്ച അജ്ഞാതർ സ്‌ഫോടകവസ്തു എറിഞ്ഞെങ്കിലും അവിടെ ഉണ്ടായിരുന്ന പ്രതിഷേധക്കാർക്കൊന്നും പരിക്കേറ്റിട്ടില്ല.

വിവ: മുഹമ്മദ് അലി

Comments