മാര്‍ച്ച് 15 ന് ന്യൂസിലാന്‌റിലെ ക്രൈസ്റ്റ്ചര്‍ച്ചിലെ മുസ്‌ലിം പള്ളിയില്‍ നടന്ന ഭീകരാക്രമണം ലോകത്തെ നടുക്കിയ സംഭവമായിരുന്നു. അമ്പതോളം പേര്‍ കൊല്ലപ്പെടുകയും നിരവധി പേര്‍ക്ക് പരിക്കേല്‍ക്കുകയും ചെയ്ത ആക്രമണത്തെ ന്യൂസിലാന്റ് ജനത തികഞ്ഞ മാനവിക മുഖത്തോടെ എതിരേറ്റ് ഇരകള്‍ക്ക് ഐക്യദാര്‍ഢ്യം പ്രഖാപിച്ചു. പ്രധാനമന്ത്രി ജസിന്റാ ആര്‍ഡേണ്‍ ഇരകളാക്കപ്പെട്ടവരുടെ ഉറ്റവര്‍ക്ക് ആശ്വാസമായും അക്രമണത്തെ ശക്തമായി അപലപിച്ചും നിലകൊണ്ടത് ലോകജനശ്രദ്ധയാകര്‍ഷിച്ച മാതൃകാ മുഹൂര്‍ത്തമായിരുന്നു. ആക്രമണത്തെത്തുടര്‍ന്ന് ചേര്‍ന്ന പാര്‍ലമെന്റ് യോഗത്തില്‍ ജസിന്റാ ആര്‍ഡേണ്‍ നടത്തിയ പ്രഭാഷണം ഒരു ജനതയുടെ വേദനകളോട് അത്രമേല്‍ ചേര്‍ന്ന് നിന്നതായി. പ്രഭാഷണത്തിന്റെ പൂര്‍ണരൂപം മലയാളത്തില്‍…

മി.സ്പീക്കർ, അസ്സലാമു അലൈകും. താങ്കൾക്കും നമുക്കെല്ലാവർക്കും സമാധാനം നേരുന്നു.

മി.സ്പീക്കർ, മാർച്ച് 15 എന്നത് നമ്മുടെ എക്കാലത്തെയും സാമൂഹിക സ്മരണക്ക് മേൽ കൊത്തിവെക്കപ്പെട്ടിരിക്കുകയാണ്. ശാന്തമായ ഒരു വെള്ളിയാഴ്ച ഉച്ച നേരത്ത് സമാധാനപൂർവം പ്രാർഥിക്കാനുള്ള ഒരിടത്തേക്ക് ഒരു മനുഷ്യൻ കൊടുങ്കാറ്റ് പോലെ കയറിച്ചെന്ന് അമ്പത് മനുഷ്യരുടെ ജീവൻ കവർന്നെടുത്തു. ആ വെള്ളിയാഴ്ച സായാഹ്നം നമ്മുടെ ദിനങ്ങളിൽ ഏറ്റവും ഇരുണ്ടതായി തീർന്നിരിക്കുന്നു. പക്ഷെ കുടുംബങ്ങളെ സംബന്ധിച്ചിടത്തോളം അതിനേക്കാൾ അപ്പുറമാണ്. അന്നാണ് മതത്തിന്റെയും ഇസ്‌ലാമിക വിശ്വാസത്തിന്റെയും ഭാഗമായി നിർവഹിച്ച ലളിതമായ ഒരു ആരാധന അവരുടെ പ്രിയപ്പെട്ടവരുടെ ജീവഹാനിയില്‍ കലാശിച്ചത്. ആ പ്രിയപ്പെട്ടവർ അവരുടെ സഹോദരന്മാരോ പെണ്മക്കളോ പിതാക്കളോ മക്കളോ ഒക്കെയായിരുന്നു. അവർ ന്യൂസീലാൻഡുകാരായിരുന്നു. അവർ നാം തന്നെയാണ്. അവർ നമ്മൾ തന്നെയായത് കൊണ്ടാണ് അവരുടെ ദു:ഖത്തിൽ നമ്മളും പങ്ക് ചേരുന്നത്. അവരെ നോക്കേണ്ട വലിയ ഉത്തരവാദിത്തം നമുക്കുണ്ട്.

മി.സ്പീക്കർ, പറയേണ്ടതും ചെയ്യേണ്ടതുമായ ഒരുപാട് കാര്യങ്ങളുണ്ട്.
ഞാനൊരിക്കലും ചെയ്യണമെന്ന് കരുതുകയോ പ്രതീക്ഷിക്കുകയോ ചെയ്യാത്ത ഒരുത്തരവാദിത്തമായിരുന്നു ഒരു രാഷ്ട്രത്തിന്റെ ദുഖം പ്രകടിപ്പിക്കേണ്ടി വരിക എന്നത്. എന്തെങ്കിലും സംഭവിച്ചവർക്ക് പരിരക്ഷ നൽകലും എല്ലാവരുടെയും സുരക്ഷ ഉറപ്പ് വരുത്തലുമാണ് ഈ സന്ദർഭത്തിൽ ഏറ്റവും പ്രധാനം.
ഇക്കാര്യത്തിൽ കുടുംബങ്ങളോട് നേർക്ക് നേരെ സംസാരിക്കാൻ ഞാൻ ആഗ്രഹിക്കുന്നു. നിങ്ങളുടെ സങ്കടത്തിന്റെ ആഴമറിയാൻ ഞങ്ങൾക്കാവില്ലായിരിക്കാം. പക്ഷെ ഓരോ ഘട്ടത്തിലും നിങ്ങളുടെ കൂടെത്തന്നെ ഞങ്ങളുണ്ട്. നമുക്കതിനു കഴിയും. ഉറപ്പായും. സ്നേഹം കൊണ്ടും ചേർത്തു പിടിച്ച് കൊണ്ടും (aroha and manaakitanga) ഞങ്ങളെ ഞങ്ങളാക്കുന്ന എല്ലാ നല്ല മൂല്യങ്ങൾക്കൊണ്ടും. ഞങ്ങളുടെ ഹൃദയം വിങ്ങുകയാണെങ്കിലും ഞങ്ങൾ ആത്മീയമായി കരുത്തോടെ തന്നെയുണ്ട്.

ജാസിന്റ ആര്‍ഡേണ്‍ കൊല്ലപ്പെട്ടവരുടെ ഉറ്റവരെ ആലിംഗനം ചെയ്യുന്നു

മി.സ്പീക്കർ, 111 ൽ വിളി വന്ന് 6 മിനിറ്റിനുള്ളിൽ തന്നെ പൊലീസ് സംഭവ സ്ഥലത്തെത്തിയിരുന്നു. അറസ്റ്റ് തന്നെ ഒരു ധീരമായ നടപടിയായിരുന്നു. കാറിനകത്ത് നിന്ന് അക്രമി വെടിയുതിർത്തു കൊണ്ടിരിക്കെ കാറിന്റെ ഡോർ വലിച്ച് തുറന്ന് അവർ അയാളെ ബലമായി വലിച്ച് പുറത്തിടുകയായിരുന്നു. കാറിനകത്താകട്ടെ സ്ഫോടക വസ്തുക്കളുമുണ്ടായിരുന്നു. ന്യൂസിലാൻഡുകാരുടെ സുരക്ഷ ഉറപ്പ് വരുത്തിയ അവരുടെ പ്രവർത്തനത്തെ നമ്മൾ ഉൾക്കൊള്ളുന്നു. അവരെ നന്ദി അറിയിക്കുന്നു. പക്ഷെ അവർ മാത്രമായിരുന്നില്ല അസാമാന്യമായ ധൈര്യം കാണിച്ചത്. പാക്കിസ്താനിൽ നിന്നുള്ള നഈം റാഷിദ് അക്രമിയുടെ നേരെ കുതിച്ച് അയാളുടെ തോക്ക് തട്ടിമാറ്റാനുള്ള ശ്രമത്തിനിടയിലാണ് കൊല്ലപ്പെട്ടത്. അദ്ദേഹത്തോടൊപ്പം ആരാധന നിർവഹിച്ചു കൊണ്ടിരുന്ന മറ്റ് മനുഷ്യരെ രക്ഷിക്കാനുള്ള ശ്രമത്തിനിടയിലാണ് അദ്ദേഹത്തിനു ജീവൻ നഷ്ടപ്പെട്ടത്‌ . അഫ്ഗാൻ കാരനായ അബ്ദുൽ അസീസ് ചെറിയൊരു പണമിടപാട് മെഷീൻ കൊണ്ടാണ് അക്രമിയെ നേരിട്ടത്. സ്വന്തം ജീവൻ പണയപ്പെടുത്തി അദ്ദേഹം കാണിച്ച ഈ ധീരത കൊണ്ടാണ് ഒട്ടേറെ പേർ മരണത്തിൽ നിന്ന് രക്ഷപ്പെട്ടത്. ഇത് പോലെ നമുക്കറിയാത്ത പല സംഭവങ്ങളുമുണ്ടാവും. ഒരോരുത്തരെയും ഈ സഭ ആദരിക്കുന്നു.

നമ്മിൽ പലർക്കും ഈ ഭീകരാക്രമണത്തിന്റെ വലുപ്പം ബോധ്യപ്പെടുത്തുന്ന ചിത്രമായി മനസ്സിലുണ്ടാവുക പരിക്കേറ്റ ആളുകളുമായി ആശുപത്രിയിലേക്ക് കുതിക്കുന്ന ആംബുലൻസ് സ്റ്റാഫിന്റേതായിരിക്കും. പരിക്കേറ്റവർക്കരികിൽ സഹായവുമായി ആദ്യമെത്തിയത് അവരും ആരോഗ്യ സേവകരും തന്നെയാണ്‌.
ഹൃദയം നിറഞ്ഞ നന്ദി. അതീവ വെല്ലുവിളി നിറഞ്ഞ സന്ദർഭമായിരുന്നിട്ട് കൂടി നിങ്ങൾ കാണിച്ച പ്രൊഫഷണലിസവും കരുതലും ഞാന്‍ നേരിട്ട് കണ്ടു. അഭിമാനം തോന്നുന്നു. ഏറെ നന്ദി.

മി.സ്പീക്കർ, നിങ്ങളുടെ അനുമതിയോടെ മുസ്‌ലിം സമൂഹത്തിന്റെയും നമ്മുടെ എല്ലാവരുടെയും സുരക്ഷ ഉറപ്പ് വരുത്താനായി അടിയന്തരമായി പരിഗണിക്കേണ്ട ചില കാര്യങ്ങൾ പങ്ക് വെക്കട്ടെ.

ഒരു രാജ്യമെന്ന നിലയിൽ നാം അതീവ ജാഗ്രത നിലനിർത്തിയേ പറ്റൂ. സവിശേഷ ഭീഷണിയൊന്നും ഇപ്പോളില്ലെങ്കിലും നാം ശ്രദ്ധയോടെ തന്നെയിരിക്കണം. നിർഭാഗ്യവശാൽ നമ്മളെക്കാൾ ഭീകരത അനുഭവിക്കേണ്ടി വന്നിട്ടുള്ള രാജ്യങ്ങളിൽ തുടർന്നുണ്ടായ നിരവധി സംഘർഷാവസ്ഥകൾ നമ്മൾ കണ്ടിട്ടുള്ളതാണ്. അതിനാൽ ജാഗ്രത വേണം.ക്രൈസ്റ്റ് ചർച്ചിൽ കൂടുതല്‍ സുരക്ഷ ഏർപ്പെടുത്തിയിട്ടുണ്ട്. പൊലീസ് പറഞ്ഞത് പോലെ രാജ്യത്തെ പള്ളി വാതിലുകൾ തുറക്കുമ്പോഴും അടച്ചിടുമ്പോഴും പൊലീസ് സംരക്ഷണമുണ്ടാവും. കുടുംബങ്ങളുടെ ആവശ്യങ്ങൾ പൂർത്തീകരിക്കപ്പെടുന്ന കാര്യത്തിൽ അങ്ങേയറ്റം ശ്രദ്ധയുണ്ട്. അതായിരിക്കണം നമ്മുടെ മുൻഗണന. ജനങ്ങൾക്ക് സഹായമുറപ്പ് വരുത്തുന്നതിന്റെ ഭാഗമായി ക്രൈസ്റ്റ് ചർച്ച് ആശുപത്രിക്കരികിൽ ഒരു കമ്മ്യൂണിറ്റി വെൽഫെയർ സെന്റർ പ്രവർത്തിക്കുന്നുണ്ട്. വിദേശത്തുള്ള കുടുംബാംഗങ്ങള്‍ക്ക്‌ സംസ്കാരത്തിനു വരാനുള്ള വിസ പ്രക്രിയ എളുപ്പമാക്കിയിട്ടുണ്ട്.പ്രിയപ്പെട്ടവരുടെ മൃതദേഹങ്ങൾ നാട്ടിലെത്തിക്കാനുള്ള ചെലവുകൾ അടക്കം സംസ്കരണ ചെലവുകൾ സർക്കാർ വഹിക്കും. മാനസികവും സാമൂഹികവുമായ പിന്തുണനൽകാനുള്ള പ്രവർത്തനവും നടന്ന് വരുന്നു. ഇതുപയോഗപ്പെടുത്തണമെന്ന് ഞാൻ അഭ്യർത്ഥിക്കുന്നു.

സമാധാനവും വൈവിധ്യവും നിലനിൽക്കുന്ന ഈ രാജ്യത്ത് ഈയൊരു സംഭവം എങ്ങിനെ ഉണ്ടായി എന്നതിനെ കുറിച്ച് ചോദ്യങ്ങൾ ബാക്കി നിൽക്കുന്നു എന്നെനിക്കറിയാം. ഇവിടെയിത് സംഭവിച്ചതിൽ രോഷം നിലനിൽക്കുന്നുണ്ട്. ഉത്തരം കിട്ടേണ്ട ഒട്ടേറെ ചോദ്യങ്ങളുണ്ട്. ഞാനുറപ്പ് നൽകുന്നു നമ്മളത് കണ്ടെത്തുക തന്നെ ചെയ്യും. വിശദമായ അന്വേഷണം നടത്താൻ കാബിനെറ്റ് തീരുമാനിച്ചിട്ടുണ്ട്. നമ്മുടെ എല്ലാ വിവരങ്ങളും വിശദമായി പരിശോധിക്കും. ഇതിനിയും ആവർത്തിക്കപ്പെട്ടുകൂടാ.
ന്യൂസിലാൻഡിന്റെ സുരക്ഷ ഉറപ്പാക്കാൻ തോക്കുമായി ബന്ധപ്പെട്ട
നമ്മുടെ നിയമങ്ങൾ പുനപ്പരിശോധിക്കേണ്ടതുണ്ട്. മി.സ്പീക്കർ നമ്മുടെ തോക്കുമായി ബന്ധപ്പെട്ട നിയമങ്ങൾ മാറും. കാബിനെറ്റ് തീരുമാനങ്ങൾ എടുത്ത് കഴിഞ്ഞു. അടുത്ത തിങ്കളാഴ്ചക്ക് മുമ്പ് തന്നെ അത്‌ പ്രഖ്യാപിക്കും.
ന്യൂസിലൻഡിലെ മുസ്‌ലിം സമുദായത്തിനു നേരെ നടന്ന ഈ ഭീകരാക്രമണത്തിന്റെ കേന്ദ്ര ബിന്ദു ഒരാളാണ്. 28 വയസ്സുള്ള ആ ഓസ്ത്രേലിയക്കാരനെതിരെ കൊലക്കുറ്റം ചുമത്തിയിട്ടുണ്ട്. ന്യൂസിലാൻഡിലെ ഏറ്റവും കടുത്ത നിയമനടപടികൾ അയാൾ നേരിടേണ്ടി വരും. ഇരയായവരുടെ കുടുംബങ്ങൾക്ക് നീതി ഉറപ്പായും കിട്ടും.

ആ ഭീകര പ്രവർത്തനത്തിലൂടെ അയാൾ പലതും ലക്ഷ്യം വെച്ചിട്ടുണ്ട്. അതിലൊന്ന് കുപ്രസിദ്ധിയാണ്. അത് കൊണ്ടാണ് ഞാനൊരിക്കലും അയാളുടെ പേരു പറയാത്തത്. ഭീകരനാണയാൾ.

കുറ്റവാളിയാണ്. തീവ്രവാദിയും. ഞാൻ സംസാരിക്കുമ്പോൾ അയാൾ പേരില്ലാത്തവനായിരിക്കും. മറ്റുള്ളവരോടും ഞാനാവശ്യപ്പെടുന്നു നമുക്ക് നഷ്ടപ്പെട്ടവരുടെ പേരാണ് പറയേണ്ടത്. അവരെ കൊന്നയാളുടെ പേരല്ല. അയാൾ കുപ്രശസ്തി ആഗ്രഹിച്ചിട്ടുണ്ടാവാം. പക്ഷെ നമ്മളയാൾക്ക് ഒന്നും കൊടുക്കാൻ പോവുന്നില്ല. അയാളുടെ പേരു പോലും.
മി.സ്പീക്കര്‍, ഇക്കാര്യത്തിൽ സോഷ്യൽ മീഡിയയുടെ പങ്കും നമ്മളന്വേഷിക്കും, രാഷ്ട്രാന്തരീയ തലത്തിൽ എന്ത് ചെയ്യാൻ കഴിയുമെന്ന് പരിശോധിക്കും. ഭിന്നിപ്പിന്റെ ഭാഷയും ആശയവും ദശാബ്ദങ്ങളായി നിലനിൽക്കുന്നുവെന്നതിൽ സംശയമില്ല. അവയുടെ പ്രചരണ രീതിയും സംഘാടനവും പുതിയതാണെന്ന് മാത്രം. ഇത്തരം കാര്യങ്ങൾ പരസ്യപ്പെടുത്തുന്ന പ്ലാറ്റ്‌ഫോമുകള്‍ക്ക്‌ അവയുടെ ഉത്തരവാദിത്തിൽ നിന്ന് കൈ കഴുകാനാവില്ല. അവരാണ് അത് പ്രസിദ്ധീകരിക്കുന്നത്‌. അവർ കേവല പോസ്റ്റ്മാനല്ല. ഉത്തരവാദിത്തമില്ലാതെ ലാഭം മാത്രം എന്ന നയം നടപ്പില്ല. വംശീയ തീവ്രവാദ അക്രമണങ്ങളെ നേരിടാനുള്ള ഉത്തരവാദിത്തം ഒരു രാജ്യമെന്ന നിലയിൽ എല്ലാവർക്കുമുണ്ട്. എല്ലാ ചോദ്യങ്ങൾക്കുമുള്ളരം നമ്മുടെ കയ്യിലില്ല. പക്ഷെ നാമത് കണ്ടെത്തി നടപടി എടുത്തേ തീരൂ.

മി.സ്പീക്കർ, ലോകത്തിന്റെ പലഭാഗങ്ങളിൽ നിന്നും നമുക്ക് കിട്ടിക്കൊണ്ടിരിക്കുന്ന സഹാനുഭൂതിക്കും ഐക്യദാർഡ്യത്തിനും നമുക്ക് നന്ദിയുണ്ട്. നമ്മളോടൊപ്പം നിന്ന ആഗോള മുസ്‌ലിം സമൂഹത്തിനും നാം നന്ദി പറയുന്നു. അവരോടൊപ്പം നമ്മളും നിൽക്കുന്നു. മി.സ്പീകർ, ഈ സഭ ക്രൈസ്റ്റ് ചർച്ചിനൊപ്പം നിൽക്കുകയും ഈ പ്രതിസന്ധിയിൽ മുസ്‌ലിം സമുദായത്തിനൊപ്പം നിന്ന സഭാംഗങ്ങളെ അഭിനന്ദിക്കുകയും ചെയൂന്നു. മാർച്ച് പതിനഞ്ച് മുതൽ നമ്മളെ സ്തഭ്ദരാക്കിയ ഒട്ടേറെ കഥകളുണ്ട്.

ഹാതി മുഹമ്മദ് ദാവൂദ് നബിയെ പ്രത്യേകം പരാമർശിക്കാൻ ഞാൻ ആഗ്രഹിക്കുന്നു. 71 വയസ്സായ ആ മനുഷ്യനാണ് പള്ളിയുടെ വാതിൽ തുറന്ന് ” ഹലോ ബ്രദർ, വെൽക്കം” എന്ന വാക്കുകൾ ഉച്ചരിച്ചത്.

അദ്ദേഹത്തിന്റെ അവസാനത്തെ മൊഴികളായിരുന്നു അത്. വാതിലിനു പിന്നിൽ മറഞ്ഞിരുന്ന ‘വെറുപ്പി’നെ കുറിച്ച് അദ്ദേഹത്തിനു യാതൊരു ധാരണയുമുണ്ടായിട്ടുണ്ടാവില്ലെന്നുറപ്പ്. പക്ഷെ അദ്ദേഹത്തിന്റെ ആ സ്വാഗത മൊഴികൾ നമ്മളോടൊരുപാട് കാര്യങ്ങൾ പറയുന്നുണ്ട്. തങ്ങളിൽ പെട്ടവരെ തുറന്ന മനസ്സോടെ, കരുതലോടെ സ്വാഗതം ചെയ്ത ഒരു വിശ്വാസ സംഹിതയിലെ അംഗമായിരുന്നു അദ്ദേഹം. ഞാൻ പല തവണ പറഞ്ഞിട്ടുള്ളത് പോലെ 200 തദ്ദേശീയതകളും 160 ഭാഷകളുമുള്ള ഒരു രാജ്യമാണ്‌ നമ്മുടേത്. നമ്മുടെ രാജ്യം എല്ലാവരേയും സ്വാഗതം ചെയ്ത് കൊണ്ട് വാതിൽ തുറന്നിട്ടിരിക്കുന്നു. വെറുപ്പും ഭയവും പകർത്തുന്നവർക്ക് നേരെ മാത്രമാണ് നാം വാതിൽ കൊട്ടിയടക്കുന്നത്.ഈ ദുഷ്കൃത്യം ചെയ്ത ആൾ ഇവിടുത്ത്കാരനായിരുന്നില്ല. അയാളിവിടെ വളർത്തപ്പെട്ടതുമല്ല. അയാളുടെ ചിന്താഗതികൾ ഇവിടുന്ന് കിട്ടിയതുമല്ല. ഇത്തരം ചിന്താഗതിക്കാർ ഇവിടെ ജീവിക്കുന്നില്ലെന്ന് പറയാനാകില്ലെങ്കിലും.


ഹാതി മുഹമ്മദ് ദാവൂദ് നബി

ഈ ഇരുണ്ട സന്ദർഭത്തിൽ സാധ്യമാകുന്ന എല്ലാ ആശ്വാസവും മുസ്‌ലിം സമൂഹത്തിനു നൽകണമെന്ന് നമ്മളാഗ്രഹിക്കുന്നു. അത് ചെയ്ത് കൊണ്ടിരിക്കുന്നു. പള്ളി വാതിലുകൾക്കരികെ പൂക്കൾ കൂമ്പാരമായിരിക്കുന്നു. ഗെയ്റ്റിനപ്പുറത്ത് നിമിഷ ഗാനങ്ങൾ അലയടിക്കുന്നു. പൊട്ടിയൊഴുകുന്ന സ്നേഹത്തിന്റെയും സാന്ത്വനത്തിന്റെയും പ്രകടനങ്ങളാണതൊക്കെ. പക്ഷെ ഇനിയുമൊരുപാട് ചെയ്യണമെന്നാണ് നമ്മളാഗ്രഹിക്കുന്നത്.
നമ്മുടെ സമൂഹത്തിലെ ഓരോരുത്തരും സുരക്ഷ അനുഭവിച്ചറിയണമെന്ന് നാമാഗ്രഹിക്കുന്നു.സുരക്ഷ എന്നാൽ അക്രമങ്ങളെ പേടിക്കേണ്ടി വരാത്ത അവസ്ഥയാണ്. അക്രമത്തിനു വളക്കൂറാകുന്ന വെറുപ്പിന്റെയും വംശീയതയുടെയും അന്തരീക്ഷത്തിൽ നിന്ന് മുക്തമായിരിക്കണമെന്നു കൂടി അതിനർഥമുണ്ട്. നമുക്കോരോരുത്തർക്കും ഇതിനെയൊക്കെ മാറ്റാനുള്ള ശേഷിയുണ്ട്.

മി.സ്പീക്കർ വെള്ളിയാഴ്ച ആയാൽ അക്രമണത്തിന്റെ ഒരാഴ്ച പിന്നിടും. മുസ്‌ലിം സമൂഹം വെള്ളിയാഴ്ച പ്രാർഥനക്കായി വീണ്ടും ഒത്തുകൂടും. നമുക്കവരുടെ ദുഖത്തിൽ പങ്ക് ചേരാം. അവരെ പിന്തുണക്കാം. നമ്മളൊന്നാണ്. അവരെന്നാൽ നമ്മൾ തന്നെയാണ്.
അസ്സലാമു അലൈകും വറഹ്മതുല്ലാഹ്.

മൊഴിമാറ്റം: കെ.മുഹമ്മദ് നജീബ്

Comments